بلدى

بلدنا حلوة أوى يا جماعة

حقيقى بجد طب بذمتك فيه بلد فى الدنيا زى مصر؟ بلد كل الحاجات المنطقية فيها مستحيلة المنال وف نفس الوقت تقدر تعمل فيها مليون حاجة مش ممكن يتعملوا ف أى بلد تانية فى العالم، ودى مش كلمتى ، دى كلمة واحد مش مصرى أساساً بس قد كده هو فهم الدنيا ماشية هنا ازاى ، هى حاجة ليها العجب بس وماله بلدنا بقى وبنحبها هه

ايه يعنى شوية فساد ومحسوبية ورشاوى وقمع واستبداد وتوريث حكم كأنها عزبة أبوهم يا سلااام ما الدنيا مليانة بلاوى

ايه يعنى انك تتعامل مواطن درجة سبعتاشر ف بلدك ويجيبولك ناس من بره يتحكموا فيك ويعملولك قوانين ويقولك بص عشان نبقى زى أمريكا ولا أوروبا ولا حتى إسرائيل ما هو لازم الواحد يبقى له قدوة ومثل أعلى ولا يعنى عايز تعيش كده من غير قدوة

ايه يعنى الظلم يوصل لدرجة كاريكاتيرية لغاية ما بقى مادة خصبة لخمسمية برنامج وتسعمية جرنال وبريد الكترونى وألف كوميديان واحنا بنضحك عليه كأنه نكتة تخيل انت لما الظلم يبقى نكتة فيه كده فى العالم يا عالم

يا جماعة مصر أم الدنيا مش مهم بقى هى أم شرعية و لا كانوا عاملين إعلان طالبين أمهات و لا هى صحيت لقت نفسها كده و لا دى شدة وحتزول مش مهم كام واحد رضع من أم الدنيا وطلعه علينا أخماس وأسداس المهم انها أم الدنيا بقالها كتير وده لقب تستحقه على الأقل بالأقدمية وحق التعيين

بحبها جداً والله بعيط لما أسمع أغنية وطنية ولا أشوف رأفت الهجان وهو بيقول رقبتى فدا مصر ولا حتى أمشى فى الشارع وأشوف الناس اللى محفور على وشها الاكتئاب والقهر وذل السنين الطويل والجرى ورا لقمة العيش والفرص اللى بتضيع وتروح لناس تانية متستاهلهاش بحبها عشان بلدى عشان مش ذنبها بس مش عارفة ذنب مين