تفاهات

الصورة التى أراها فى المرآة لا تشبهنى

الأيام التى تمضى لا تستقر فى ذاكرتى

الأصدقاء الذين عاشرتهم عمراً لا يعرفونى

الحلم حقيقة غير مرغوبة

الحب مشروط بشروط لا يستقيم بها

الأغانى صوتها موجع

كارمن

وحدى بلا أحباب اعيش كل الليالى

لا حب لا أصحاب وجع هى أيامى

أرقص ووحدى أغنى

لا شئ يمنع صوتى

وليس لك أن تلمنى

فأنا أرفض صمتى

لا وقت لمن لا يرانى

ولايحس بنبضى

ولا يشتهى أحضانى

فالحب يهتف بى

محمد بغدادى

poem

لا أحب الانسان يرضخ للوهم ويرضى بتفاهات الأمانى

ان حيا هاب أن يلمس النور كميت فى ظلمة الأكفان

الشجاع الشجاع الذى أمسى يتغنى والدمع فى الأجفان

زوجى يعشق إمرأة غيرى

هل صدقتنى عندما سألتك أن تهتم بها؟ أجلس فى فراشى أفكر فيك وأنت تدور فى فلكها ، فتنهار الأرض من تحت قدمى ، عالمها هو أنت وهى ، وعالمى هو أنت فقط. عالمك هو كلانا وأنت، لم أطلب منك الابتعاد لأنى ملاك يرفرف بجناحيه مباركاً سعادتكما و لا رغبة فى أداء دور التضحية الخالد أو بقايا مازوخية الأنثى المتوارثة عن أجيال أوشكت على الاندثار، و لا كل الأسباب التى ادعيتها أمامك كاذبة عمداً مع سبق الإصرار، سألتك أن تجيب محاولاتها المستميتة للاحتفاظ بك والحفاظ عليك، لأننى كنت أعلم أن هذا ما ستفعله رغماً عنى ، ولأننى لن أعلم أبداً متى سيكون لدى القدرة على احتمال هذا ففضلت ان أقتل نفسى بيدى لأن الانتظار موت لا مفر منه..
حيثيات حكمى لن تخرج من أحلام يقظتى وكوابيسى الليلية أو أن هذا ما أتمناه، فأحياناً أراك بعين اليقين وأنت تأتى معتذراً عن عمراً بأكمله قضيته فى محراب محاولة إسعادك، ستأتى مطرق الرأس دامع العينين متهدج الصوت لتكتب كلمة النهاية على بطلة فيلمك الأخير، كان جل ما يعجبنى فى الحياة أنها فيلماً لن يستطيع أحد أن يحرمك من متعة استنتاج نهايته دون المعرفة الحقيقية به، أحياناً.. يكون من الأفضل أن أعرفها، سأنتظر فى مكانى هذا، بقلبى هذا وعقلى هذا، سأنتظر جودو الذى لن يأتى أبداً والذى أرجو عدم مجيئه، سأنتظر حكمها على عالمى القائم على عالمها هى، فسعادتها ستعنى سعادتك التى ستسعدنى، وغضبها سيأخذ من عمرى أياماً لمداواته بجراحى أنا..
لا تنسى أبداً أننى لا أملك ما يغنينى عنك ولا ما يكفينى دونك، لا تنسى أنى حملت كل الماضى والحاضر والمستقبل فى بيت لن يسكنه غيرك ، الشمس لن تشرق لو لم تأت ، لا تتركنى طويلاً فأنا لا أرى الدنيا إلا بعيونك ، أخبرها عنى، قل لها أنى أحبك حباً يكفى لأن أحبها معك , أخبرها عنى، ربما تشعر بإحساسى فهى تعلم مالذى يعنيه وجودك فى حياة من يحبك ، أخبرها عنى ، أخبرها كم أحبك وكم أرغب فى حبك، أرجوك أن تخبرها..

الروح

الروح من أمر ربى، أغرب حاجة فى الدنيا انك تمتلك حاجة متقدرش تشوفها الأغرب ان الحاجة دى هى انت هى اللى بتحب وتكره وتتحكم فى كل حاجة تخصك حتى شكلك، مش فيه ناس شكلها مريح، وناس شكلها أستغفر الله والأغرب من كده من بقى لما تشوف حد تحبه من أول مرة وحد تانى متطيقهوش ده حتى الأماكن نفسها بتبقى شايلة أرواح أصحابها ، فى أماكن كئيبة وأماكن مريحة وأماكن مبهجة وأماكن مقبضة وأماكن بخيلة، وأماكن كريمة!!! فى كده فعلاً أكيد بيجيلك الإحساس ده الأغرب بقى الناس اللى بتحب بعض سواء أصحاب أو أزواج أو بيحبوا بعض بيبقوا شبه بعض بعد فترة، إزاى بيحصل كده؟
معنديش طبعاً إجابة يعنى الروح دى بتتشكل زى ما هى عايزة ؟بتتشكل حسب هى بتحب إيه؟ طب إحنا مين؟ دورنا إيه فى الموضوع ؟ يا ترى روحى شكلها إيه؟ واللى بشوفها فى المرايا دى مين؟ ولما أقول على حد ده توأم روحى ده معناه ان روحه شبه روحى؟
نفسى أوى أشوف روحى :)

اختيارك

كان فيه أغنية لإيهاب توفيق مش فاكرة امتى فيها مقطع بيقول وتيجى تسأل مين الظالم تلقى كل الناس مظلومة

دلوقت بقى تسأل مين الخانق تلقى كل الناس مخنوقة

كل الناس عندها ملل واكتئاب واحباط وحالة قرف هستيرية من العيش والعيشة واللى عايشنها على رأى العبقرى محمد صبحى

همم العيب فيكو يا ف حبايايكم أما الدنيا فهى جميلة جداً جداً أجمل ما فيها انها فيلم محدش حيقولك نهايته

كفاية الفضول اللذيذ بتاع ياترى بكره حيحصل ايه، أحلامى حتتحقق؟ فلان حيتجوز فلانة؟ جمال مبارك حيمسك الحكم فعلاً؟ حيعملوا الرواية دى فيلم؟ حجيب أولاد ولا بنات ولا مش حخلف خالص ولا حخلف والعيال حيطلعوا تلاتة عينى؟

فيلم بجد يعنى مش هزار تبقى الأحداث ماشية فى حتة وفجأة تلاقى كل حاجة اتشقلبت من حيث لا تدرى ولا تعلم وبعد شوية حتلاقى ان الشقلبة دى كان ليها حكمة ده لو كنت مؤمن وحتلاقى انها حاجة بنت تلاتين فى سبعين لو كنت مش مركز أوى

هو السؤال اللى بيفرض نفسه لو افترضنا ان الحياة فعلا سيئة ، ليه احنا متمسكين بيها أوى كده، ولو كان عشان غريزة البقاء ليس إلا ليه منحاولش نشوفها بشكل تانى عشان منكدش على نفسنا وع اللى جابونا ويعرفونا

أكيد عندنا ألف سبب يخلينا بنحب الحياة وألف تانيين يخلونا نكره أبوها المسألة محتاجة شوية تركيز

يا تخليك فى الألف الأولى يا الألف التانية

وصدقنى فى الآخر هو اختيارك انت

الخلود

فكرة الخلود بترعبنى ، صحيح الرعب الأكبر هو ياترى حندخل النار بأعمالنا السودا ولا حندخل الجنة برحمة ربى، بس فكرة الخلود فى حد ذاتها فكرة مخبفة

تخيل انت بعد ما كانت كل حاجة فى الحياة قابلة للانتهاء، المرض، الصحة ، السعادة، الحزن، الخوف، الأمان، الحب ، الكراهية، العمر نفسه قابل للنهاية فى أى لحظة ، عشان كده مش قادرة أستوعب مفهوم الخلود

يعنى ايه عمرك ما حتموت؟ يعنى ايه مافيش نهاية؟ يعنى مافيش أيام؟ شهور؟سنين؟ حيبقى الزمن شكله ايه؟ حيعدى .إزاى؟ بطئ ولا مش محسوس؟ حيبقى فيه أحداث؟ حيبقى فيه امبارح؟ بكره؟

طب حنتعرف على ناس جديد ويبقى لنا صحاب؟ ومش حيبقى فيه خناقات ولا غيرة ولا مشاكل ؟ طب لو يارب دخلنا الجنة وشفناها حنقعد فى نعيم على طول؟ إحنا ساعات بنزهق فى الدنيا من الراحة والرفاهية ساعات يعنى طب إيه

مش عارفة ، عشان الخلود ده حاجة محصلتش قبل كده مش قادرة أستوعبها أكيد ساعتها حيبقى فيه مقاييس غير مقاييس الدنيا

بس مش فكرة مرعبة بذمتكوا؟

حبيبى

حبيبى
حبيبى كأنها وجدت فقط من أجلك، أراك حين أكتبها، وحين أقرأها، وحين أسمعها، حبيبى، كلك حبيبى، أحب كل ما تقوله ،وما تفعله، وأتمتع بتخيل ما تكونه مع الآخرين، أرقبك وأنت تتحدث، أو تدندن، أو تضحك، أو تلتفت، أو تفكر، أو تعقد حاجبيك فى محاولة لتذكر شئ أنت تعلم جيدا أنك لن تتذكره، أرقبك وأنت تأكل، أو تدخن على عجل، كأن الزمن يلاحقك، كأنه لا يكفيك
أرقبك وأنت تمشى فى دوائر وهمية، منهمكا فى الحديث مع أى أحد، فأتمنى أن أنتزع منك كل ما يصلك بمن هو ليس أنا، أرقبك وأنت متوتر، أو قلق ،أو غاضب، وأنت متحمس أثناء حكيك لى عن شخص ما، أو شيئا ما عرفته، أو تعلمته كطفل يرى الحياة لأول مرة، ويريد أن يروى كل ما رآه كأنه وحده عرف مالم يعرفه الآخرون
أرقبك حين تكون أنانيا، لاترى سوى ما يرضيك، و لا تبغى إلا ما يسعدك أنت فقط
أرقبك حين تحاول أن تخبرنى بشئ تعلم جيدا أنه سيضايقنى متصنعا الأسف الذى لا يلبث أن يتلاشى حين أطمئنك أنه لا شئ تفعله يغضبنى منك
أرقبك حين تكون حنونا دافئا رقيقا، وحين تضمنى إلى صدرك، فأشعر بالانتماء، والأمان، والراحة والطمأنينة، و لا أرغب فى العودة مرة أخرى إلى هذا العالم
أرقبك وأنت لا تريد الاعتراف بأخطائك وتقصيرك فأنت لا تطيق اللوم أو العتاب ولا تتحمل العقاب
،أرقبك وأنت تفيض بالرجولة وتدعنى ألقى عليك كل همومى ومسئولياتى، فتعيدها إلى لأنك لا تستطيع الا أن تكون طفلا عابثا
أرقب فيك كل ما يأتى به الناس، إلا أنك لست مثل الناس، متفرد أنت كما لن تدرك أبدا، تسألنى إذا كنت أحبك ! أصمت ! أفكر! هل أحبك؟! هل أحبك؟! من سأكون اذن لو لست أحبك هذه هويتى حبك أعاد تشكيلى، أعاد صياغتى، أنا هى كل ما تريدنى أن أكونه

bibliotica alexandrina

مش حتصدقوا هى قد ايه حلوة

بلدى

بلدنا حلوة أوى يا جماعة

حقيقى بجد طب بذمتك فيه بلد فى الدنيا زى مصر؟ بلد كل الحاجات المنطقية فيها مستحيلة المنال وف نفس الوقت تقدر تعمل فيها مليون حاجة مش ممكن يتعملوا ف أى بلد تانية فى العالم، ودى مش كلمتى ، دى كلمة واحد مش مصرى أساساً بس قد كده هو فهم الدنيا ماشية هنا ازاى ، هى حاجة ليها العجب بس وماله بلدنا بقى وبنحبها هه

ايه يعنى شوية فساد ومحسوبية ورشاوى وقمع واستبداد وتوريث حكم كأنها عزبة أبوهم يا سلااام ما الدنيا مليانة بلاوى

ايه يعنى انك تتعامل مواطن درجة سبعتاشر ف بلدك ويجيبولك ناس من بره يتحكموا فيك ويعملولك قوانين ويقولك بص عشان نبقى زى أمريكا ولا أوروبا ولا حتى إسرائيل ما هو لازم الواحد يبقى له قدوة ومثل أعلى ولا يعنى عايز تعيش كده من غير قدوة

ايه يعنى الظلم يوصل لدرجة كاريكاتيرية لغاية ما بقى مادة خصبة لخمسمية برنامج وتسعمية جرنال وبريد الكترونى وألف كوميديان واحنا بنضحك عليه كأنه نكتة تخيل انت لما الظلم يبقى نكتة فيه كده فى العالم يا عالم

يا جماعة مصر أم الدنيا مش مهم بقى هى أم شرعية و لا كانوا عاملين إعلان طالبين أمهات و لا هى صحيت لقت نفسها كده و لا دى شدة وحتزول مش مهم كام واحد رضع من أم الدنيا وطلعه علينا أخماس وأسداس المهم انها أم الدنيا بقالها كتير وده لقب تستحقه على الأقل بالأقدمية وحق التعيين

بحبها جداً والله بعيط لما أسمع أغنية وطنية ولا أشوف رأفت الهجان وهو بيقول رقبتى فدا مصر ولا حتى أمشى فى الشارع وأشوف الناس اللى محفور على وشها الاكتئاب والقهر وذل السنين الطويل والجرى ورا لقمة العيش والفرص اللى بتضيع وتروح لناس تانية متستاهلهاش بحبها عشان بلدى عشان مش ذنبها بس مش عارفة ذنب مين

الجنة

عندما تصبح لى الجنة وحدى

أزرع الجنة احساسا ونبضا

أرتدى الثوب الذى أختاره

لا الذى تفرضه الأذواق فرضا

لا قيود حول شعرى

لا حزام فوق خصرى

وبوجهى الأبيض الخالى من الأصباغ

من أية زينة

وبشعرى الثائر اللامع

كالإشراق فى السحب الحزينة

سوف أحيا فى حياتى حرة

تغمر الروح ارتعاشات السكينة

عن قصيدة بالفرنسية لسلوى حجازى
كامل الشناوى